ضبابية.. شعر جاسر جمال الدين

ضبابية.. شعر جاسر جمال الدين
كتب -

ليه الساعات هشه
وناهش عقلى يا توتر
فاضل ثوانى ..وربنا يستر
كان ممكن أحكيلكم
عن قصتى لكن
لسه الغمام داكن
والرؤيه ضبابيه
غيرت عينى
لقيتها ..كما هيه
عملت توريه
وكثفت تعبيرى
اللقطه بكره هتبقى من غيرى
هكون بعيد جدا…
ولو انى فى سريرى
بحاول انى استطعم الاحلام
وانام وانا مفتح
كان غيرك أنصح
– يا أيها المعتوه
أخرك ..
فى دايره تتوه
والحلم لو خبوه
هتنام بدون روحك
ولحظتك تأزف
تنشر غسيل الدمع فى سطوحك
تنشف جروحك
برغم انها بتنزف
تشرب مرار الوهم
من كولدير سكوتك
تنزوى بشويش
زى اللهب فى الخيش
وموتك
مش تتر نهايتها
لسه السكه بدايتها
وانت يادوب كائن
قد تشبه الأنسان
لكن أكيد أبطئ
والروح شجر دبلان
فى الهوا طقطق

الوسوم