“الحياة مبتقفش علي حد” لـ عبدلله الأمير

“الحياة مبتقفش علي حد” لـ عبدلله الأمير

الحياة مبتقفش علي حد.. ! ، الجملة دي سمعناها و بنسمعها كتير ، وغالباّ الجملة دي حقيقي ، لأن مهما كان الحد أو الشخص ده مهم بالنسبة ليك وتربطك بيه صلة قوية ، حياتك هتستمر من بعده لو انت عايز ؟؟ لو أنت عايز دي هي أهمّ حاجة ف الموضوع ، أو زي ما بيقولوا هي لُب الموضوع ، عشان إرادتك هي الأساس ف الأصل ، وانت اللي بتاخد قرارك بنفسك ، لو قررت ان حياتك تمشي من بعده وتنسي ، حياتك هتمشي مش هتقولك لا مش همشي وغيره ، وان قررت العكس فـ متلومش إلا نفسك ، فالحياة فعلا مبتقفش علي حد بس بتتغير بوجود ناس معينة واختفائهم ، عمر الحياة بوجود الناس دي ما بتكون زي الحياة من غيرهم أبداً ، عمر الأماكن اللي روحتوها مع بعض ما تبقي نفس الأماكن من غيرهم ،

و لا المزيكا اللي سمعتوها مع بعض بيبقي ليها نفس الطعم

من غيرهم ، ولا حتي أحلامك اللي كانوا جزء منها بتفضل زي ما هيّ ، كل حاجة بيبقي ليها طعم مختلف من غير الناس دي ، حياتك بيكون فيها حاجة ناقصة ، بتحس كده بحزن وشجن لما تفتكرهم أو تفتكر حاجة كنت بتعملوها سوا ، أو حتي تعدي ف نفس الشارع اللي مشيتوا فيه مع بعض ، بتعيش من بعدهم عادي ، ويمكن تنبسط وتفرح وتحقق كل اللي انت عايزه إلا الجزء بتاعهم ف أحلامك ، بس بردو هتفضل الحاجات اللي هما كانوا جزء منها مختلفة للأبد ، هتفضل مختلفة عشان مينفعش نصفر العداد بتاع الحياة من بعد ما اشتغل وابتدا يعد ، ده زي مصطفي ابراهيم قال :- ( اللي انكتب بالجاف مبيتمسحش خلاص ، والدنيا مفهاش حرف بينكتب برصاص ) وعشان لسه مش اخترعوا جهاز يخلينا نقدر نمحي كل ذكراياتهم معانا ،…

و رغم كل الزعل والتعب اللي بنحس بيه بسببهم ، وبسبب ذكراياتهم ، بتفضل الذكرايات دي عندها القدرة انها ترسم ابتسامة بلهاء علي وشنا محدش عمره هيفهمها غيرنا ، باختصار حياتنا هتمشي من غيرهم لأن هييجي أفضل منهم يحبنا زي ما احنا ويحببنا ف الحياة ، فـ متوقفش حياتك ع وجود حد و غيابه لأن محدش هيحس بيك غير نفسك ، فمتضيعش نفسك وحياتك عشان حد ما .

عبدالله رمضان عبدالله، كلية التربية جامعة بني سويف، الفرقة التالتة  قسم الغة العربية، من مركز اهناسيا المدينه، قرية كوم الرمل البحري

يهوى ويعشق الشعر وكاتب مقالات عامية

 

الوسوم